வீழ்வேன் என நினைத்தீரோ

உலகங்கள் ஒரு சேர எதிர்த்தாற் கூட

உள்ளிருக்கும் உண்மை ஒளி துணையாய் நின்றால்

விலகுங்கள் என்றவரை விரட்டித் தள்ளி

வீறுடனே வெற்றி பெற்று உயர்வேன் உண்மை

கலகங்கள் ஒரு நூறு செய்து என்னைக்

கால்வார நினைப்பவரைக் கருதி அஞ்சேன்

பழகுங்கள் அன்புடனே பாதம் சேர்வேன்  

பகை கொண்டால் படையெனிலும் எதிர்த்தே நிற்பேன்

வழிகாட்டல் வாழ்த்துரைகள் வெளியே செய்து

வஞ்சகமாய் நெஞ்சகத்தில் தூற்றும் நெஞ்சும்

குழி தோண்டிக் குறிவைத்துக் குதறக் காக்கும்

குறுமதியார் கூட்டத்தின் உறவும் வேண்டேன்

பழிவேண்டேன் பகைவளர்க்கேன் பாசஞ்செய்வேன்

 பாய்ந்துவரில் பயந்தொழியேன் பாவம் பாரேன்

விழிபிதுங்க விரட்டுவதே வழியாய்க் கொள்வேன்

விறகுதலைத் தடியர்கட்கு விதி விலக்காவேன்

வீழ்வேன் என்று எனை வருத்த விட்டு வையேன்

வீணர்களின் வார்த்தைகளால் வருத்தம் கொள்ளேன்

ஆழ்வோரின் புகழ்பாடேன் அறத்தை மிஞ்சேன்

ஆணவத்தால் அன்புடையோர் மனத்தை வையேன்

வாழ்வதுவும் தாழ்வதுவும் வல்லோன் நெஞ்சால்

வாதிடுவோர் அறியாமை அதை என் சொல்ல !

நீள்வது என் நெடுவழியாம் நெஞ்சம் சோரேன்

நீசர்களின் பழிப்புரையைச் சிரிப்பால் வெல்வேன்