என்ன கொடுமை சார்

நாட்டில் உள்ள யாவருக்கும் நலம் பயக்கும் என்று சொல்லி

வீட்டிருக்கப் பணித்தார்கள் சரிதான் - போட்டிருந்த

ஊரடங்கு வேளையிலும் உசுப்புகிற பகை வளர்த்து  

போர்தொடுத்தார் வாள்ப்பாணம் பார்

நாட்டில் சனக்கூட்டம் நலிந்தாக வேண்டும் என

வீட்டில் அது பெருக்கி விட்டீரேல் - நாட்டமுடன்

ஊரடங்கு போட்ட உயர் நோக்கம் கூடாது

பாரடங்கும் சுமை கூடித்தாண்

உணவருந்து முன்னம் உடல் கை முகம் கழுவி

மணமுள்ள வாசனைகள் போட்டிடுக - குணமுள்ள

குலக் கொடியோடானாலும்  குறித்தபடி பேணிடுக

நலமோடு ஒருமீற்றர் நன்று

தாய் பிள்ளையானாலும் தந்தை மகனானாலும்  

நாய் பூனை போற் தூர நிற்க - வாய்மூடி

வருகிருமிப் பெரியோனை வழியனுப்பி விடைகொடுத்தால்

அருகிருந்து பேணிடலாம் அன்பு

காலை முதல் மாலை வரை கண்ணுற்றபடி இருந்தால்

வேலைக்கு ஆகாது வீட்டை விட்டு - சாலையிலே

நடமாடி வந்தாற் தான் நலியாது மனித மனம்

இடங்கொடுத்து இரங்குவார் யார்

ஆண்டவனே உன் அடியைத் தொழுதேன் வாழி!

வேண்டுவது வேறொன்றும் இல்லைக் கண்டாய் - நீண்டசுகம்

இருமலொடு தடிமன் இலா இயல்பாம்  வாழ்வை

அருகில்உள்ள அனைவருக்கும் தா

மூன்று மணி நேரம் முழுதாகக் காத்திருந்து

நான் புகுந்த வேளை நலிந்த ஒரு - சாணளவு

கறிவேப்பிலைக் கட்டே கிடைத்த கதை நான் கூறின்

பறிபோகும் என்மானம் பார்

ஆறு மணி நேர அவகாச அறிவிப்பில்

ஊரடங்குச் சட்டத்தை உமதாக்க - ‘பார்’தேடி

மீன் இறைச்சி உண்டா ?மெதுவடைதான் எங்கென்று

வீண்பொருட்கள் தேடுவது வீண்

இப்படியே நிலை தொடர்ந்தால் இடி விழுந்த மரமாகி

இப் புவி உளோர் எல்லாம் இடர் உறுவர் - தப்பாது

பஞ்சமழை பெய்தவனி பாழாகப் போகு முன்னே

தஞ்சமழை கொஞ்சமேனுந் தா

வீட்டில் இருக்கையிலே விஞ்சு பசி எடுக்கிறது

போட்டிருக்கும் சட்டமதால் போய் வரவும் - நாட்டமில்லை

பஞ்சமழை பெய்தவனி பாழாகப் போகு முன்னே

தஞ்சமழை கொஞ்சமேனும் தா